Omicron殺入社區，幼稚園和小學暫停面授課堂，一眾學童又要回到網課日子。陳柏宇太太符曉薇（Leanne）日前在IG story大呻同讀K1的囡囡Abigail（Abi）上Zoom上到「嘔血」，完全係好多家長的噩夢。

1月14日起是一眾幼稚園和小學重回網課的日子，符曉薇在網課第一天已在IG Story問︰「有冇人睇住小朋友上Zoom會嘔血？」，粉絲回答：「唔係佢上堂係你上堂」。Leanne回應：「係！我上緊訓練EQ堂，一定係神俾我嘅挑戰」。 

Leanne大爆囡囡上Zoom勁唔專心，「瞓喺度、要餅餅、畫Mon、唔聽書、老師叫做咩都唔做。」到唱歌時間，可能是盡得爸爸音樂天份，把聲仲大過老師。Leanne幻想自己係老師的話，會把Abigail轉為靜音；又不斷提醒自己「放鬆啲、扮睇唔到」，仲問網民推介降血壓藥，睇嚟網課日子真係激心。

「好似食咗十個火鍋」

事後，Leanne亦有出post叫自己冷靜，「我要保持心情平靜，呢一句將會係我每一次，同標姐上zoom嘅口號，各位媽媽我哋一齊加油，同我一齊深呼吸，大聲講今日天氣真係好，今日嘅空氣真係好，今日心情真係愉快。」仲形容「上完zoom好似食咗十個火鍋咁」，有網民就建議「你要貼張「莫生氣」係abi個背脊」、「叫陳伯(陳柏宇)買定幾盒靜心」，好多媽媽有同感，「睇開啲會好啲！」